Stu sabbatu 3 di maghju di u 2008, u nostru sindicatu, a Ghjuventù Paolina, cù l’Associu di i Parenti Corsi, a Ghjuventù Indipendentista è a Cunsulta di i Studienti Corsi, urganizemu parechje mubilizazione per dumandà a mudifica di l’articulu secondu di a Custituzione, ciò chì ci permetteria d’uttene un veru statutu ghjuridicu per a lingua corsa.
E mobilizazione si teneranu:
-Bastia è Aiacciu, davanti à a Prefettura
-Purtivecchju, davanti à a Merria
-Fium’Orbu, davanti à a panatteria “a Fiumorbaccia”
Eccu u trattu ch’è n’avemu da distribuì:
A lingua corsa hè l’ughjettu d’un gran accunsentu in a sucetà corsa, chì hè statu traduttu da un votu di modu unanimu à a CTC è da un votu di i quattru deputati à l’Assemblea Naziunale à prò d’una mudifica di a Custituzione, chì permetteria un statutu ghjuridicu per e lingue dette regiunale.
U mercuri 7 di maghju si tenerà un dibattitu di primura à u palazzu Bourbon chì tuccherà questa prublematica.
Oghje, a ricuniscenza ghjuridica di queste quì hè pruibita da l’articulu secondu di a Custituzione chì dice chì : « a sola lingua di a Republica hè u francese ».
Tocca à i quattru deputati di a Corsica di misurà l’inghjocu di stu dibattitu è di permette a mudifica di l’articulu secondu di a Custituzione.
Per quessa, chjamemu ogni assemblea parlementaria (Assemblea di Corsica, Cunsiglii Generali, Cumune…) ad aduprà una muzione à prò d’un statutu ghjuridicu di a lingua corsa.